Dad ina vart duai vegnir augmentada la segirezza da naiv, da l’autra stoppian ils implants existents da vegnir modernisads. Ultra da quai dovria er investiziuns en la purschida gastronomica ils proxims onns, scrivan Segl e Silvaplauna ensemen cun la Corvatsch SA en ina communicaziun cuminaivla. Las investiziuns en ils implants da transport, las pistas e la gastronomia faschess la societad sez.
«Model da PPP»
Per finanziar cuminaivlamain las investiziuns da total 50 milliuns francs, èn las trais partidas sa cunvegnidas da duvrar il model da finanziaziun cun in partenariat public-privat.
Previs fiss da fundar ina nova societad d’INFRA. Il chapital da basa per quella sa cumponiss da l’infrastructura existenta da la Corvatsch SA e da mintgamai 12.5 milliuns francs che las duas vischnancas mettessan a disposiziun.
Analisas e concepts
En in proxim pass duain spezialists externs elavurar ed examinar il concept previs. Segl e Silvaplauna sco vischnancas da domicil da la Corvatsch SA èn gia participadas cun aczias a la societad.
Uss valiteschan las suprastanzas las duas muntognas cleramain sco spierta turistica fitg impurtanta per la regiun – tant l’enviern sco er la stad. Perquai proponan ils gremis da porscher maun.
L’ultim pled en chapitel a reguard las investiziuns han dentant las radunanzas communalas.