Ir cun skis? Mai fatg, ma uss sun jau Voluntari!

La giuvna schurnalista Katrin Margraff da la Belgia lavura sco Voluntari al campiunadi mundial da skis a San Murezzan.

Katrin Magraff Bild in Lightbox öffnen.

Legenda da maletgs: Katrin Margraff. Schurnalista da la Belgia, vegn sco voluntari al campiunadi mundial da skis a San Murezzan. RTR, David Spinnler

Durant il november 2015 ha Katrin Margraff visità San Murezzan e l'organisaziun per il campiunadi mundial da skis a San Murezzan sco schurnalista dal «Belgischer Rundfunk». Ella ha fatg ina reportascha da tut quai ch'ins sto fabritgar en il territori da skis. Per ella in tema exotic cunquai che sport da skis n'è betg enconuschent en Belgia, in pajais senza muntognas. Las muntognas engiadinaisas e la vista a Salastrains nua che l'arrivada da las cursas da ski dal campiunadi mundial è lura, tut quai ha dentant impressiunà talmain Katrin Margraff ch'ella ha decis da returnar a San Murezzan – sco Voluntari.

Lavur en il team da medias

Ussa ha Katrin Margraff fatg la prima visita a San Murezzan sco Voluntari. Ella è part dal team da medias. Sia incumbensa vegn ad esser la pagina d'internet dal campiunadi mundial. Quai malgrad ch'ella n'è anc mai stada sin skis. Ella stoppia ussa emprender ils nums dals stars, ha ella ditg envers RTR. E lura hai dà ina premiera per ella la fin d'emna passada: Ella è per l'emprima giada sa vestgida cun chautschas ed ina giacca da skis, il dress dals Voluntaris. Suenter il campiunadi mundial da skis a San Murezzan vul Katrin Margraff lura era anc emprender dad ir sez sun skis.

Emissiun tar quest artitgel