Las lavurs da preparaziun per il project spectacular han cumenzà schon quest mais. In consorzi da trais firmas bajegia il mument si ina plattafurma speziala sin la quala sa chattan lura ils containers cun las chombras da cumpressiun per ils sfunsaders ed ils biros per l'entira squadra enturn.
In mais sut pressiun permanenta
Per far las lavurs, radund 110 meters sut la surfatscha da l'aua, ston ils sfunsaders viver in mais permanentamain sut ina pressiun da 10 bar. Quels lavuran durant ils mais zercladur e settember davent dad ina plattafurma speziala.
A la fin da las lavurs ston ils sfunsaders far tras ina fasa da decumpressiun da 5 dis per pudair sortir da la chombra da cumpressiun.
Fatgs davart la plattafurma sin il lai d'accumulaziun
- 51 elements
- mintg'element paisa 5 tonnas
- vegnan montads surtut da 3 spezialists ollandais
- ils elements vegnan per gronda part da la Frantscha
Las lavurs sut aua cumenzan ils 13 da zercladur. Las ovras electricas d'Engiadina investeschan 24.5 milliuns francs en il project.
