Johannes Berndl gudogna il maraton da velo da l’Engiadina

Johannes Berndl da la Germania ha battì Matteo Badilatti da Poschiavo pir sin ils ultims kilometers. Meglier Engiadinais è Andrea Florinett da Scuol sin il setavel plaz.

Mo pauc ha mancà a Matteo Badilatti da Poschiavo per la victoria dal maraton da velo da l’Engiadina a Zernez. Sin il traject lung sur 211 km è el stà a la testa da cursa fin curt davant l’arrivada.

Badilatti ha pers la forza

Sin il pass da l’Alvra aveva el anc in avantatg da bunamain 2 minutas. La fin han mancà las forzas a Badilatti e Johannes Berndl ha surpassà el e gudagnà la cursa en in temp da 6:22.31. Badilatti ha gì in retard da 26 secundas. Sin la terza plazza è il talian Riccardo Corbetto.

Il maraton da velo en Engiadina

Andrea Florinett da Scuol è setavel e meglier Engiadinais. Tar las dunnas è la victoria ida a Viviane Spielmann dad Uerikon. Ella ha gì in temp da 7:08.56. Radund 1’050 ciclists èn sa participads a quella cursa.

Arthur Schlatter da Scuol sco unic massader. Avrir maletg en lightbox.

Legenda da maletgs: Arthur Schlatter da Scuol sco unic massader. RTR, R. Mayer

Blera lavur per Arthur Schlatter

Per manar tras ina cursa da quellas dimensiuns dovra quai blers voluntaris, saja quai sin in traject ma er a l’arrivada.

Ina persuna ch’è stada activa durant tut il di è stà Arthur Schlatter da Scuol. El d’era l’unic massader per las ciclistas ed ils ciclists ch’avevan problems cun la musculatura.

Il velo d'accident. Avrir maletg en lightbox.

Legenda da maletgs: Il velo dal ciclist era grevamain sturschì suenter l'accident. Polizia chantunala dal Grischun

Grev accident durant la cursa

Tranter Forcola di Livigno e La Motta ha quai dà l’avantmezdi in accident cun in velo da cursa. Il ciclist da 31 onns ch’era sa participà al maraton da velo è sa blessà grevamain. El è vegnì transportà cun la Rega en l’Ospital chantunal a Cuira. Durant la cursa hai plinavant er dà intgins auters accidents individuals da participants.

RR novitads 17:00