Siglir tar il cuntegn

Header

video
Co vinavant cun il center da giuventetgna a Sta. Maria?
Or da Telesguard dals 29.11.2023.
laschar ir. Durada: 3 minutas 48 Secundas.
cuntegn

«Jugi» Val Müstair sto spetgar En tschertga da soluziuns per l'albiert da giuventetgna

L’albiert da giuventetgna ch'è en possess da la vischnanca Val Müstair è serrà e duess vegnir renovà. Il problem è che auters projects avessan prioritad.

La Fundaziun svizra da turissem social che maina ils albierts da giuventetgna en Svizra è ditg stada a fit en la Chasa Plaz a Sta. Maria. Causa che la chasa fabritgada il 1537 na sa cunfascheva betg pli cun las pretaisas da la fundaziun aveva ella desditg il contract sin l'avrigl 2022.

La uschè numnada «jugi» purtava onn per onn 4’000 pernottaziuns, radund 4% dal total en la val.

Investiziuns e co vinavant

La vischnanca Val Müstair è la possessura da la chasa. Ella vesa il basegn d’in albiert per giuventetgna ed era il basegn da far lavurs da renovaziun per che la fundaziun da turissem social turna e prenda a fit la chasa.

Emprimas calculaziuns prevesan investiziuns da vers tschintg milliuns francs. La situaziun finanziala da la vischnanca permetta tenor la presidenta Gabriella Binkert Becchetti be 3 fin maximalmain 3,5 milliuns francs.

Ina pussibilitad fiss da vender la chasa, quai che manass raps en cassa empè da be custs. Tenor la presidenta communala na saja quai dentant betg pussibel causa il contract da cumpra da l’object d’avant 60 onns che pretenda che la chasa vegnia manada en avegnir dal cumin sco albiert.

Sco proxim pass elavurescha la suprastanza communala ina proposta per ina restauraziun main custaivla da la chasa istorica. Quella proposta vegn a vegnir preschentada lura a la populaziun.

RTR actualitad 17:00

Artitgels legids il pli savens