L'onn 2016 ha il kino «Cinè Scala» stuì serrar sias portas, quai pervia ch’il stabiliment nua ch’il kino aveva ses lieu, era en privel da dar ensemen. Uschia è in’èra da varga 90 onns cultura da kino en Engiadina ida a fin. Enfin ussa. Suenter plirs onns da planisaziun e construcziun as avran las portas d’in nov kino a San Murezzan puspè e quai al medem lieu. Dapi il 2019 è il stabiliment numnadamain vegnì sanà a moda fitg pretensiusa, quai cun stabilisar la costa davos il stabiliment.
Dapli che be in kino
Era il stabiliment stess è vegnì sanà a l’engronda. Sper il kino ha l’interprendider e possessur dal stabiliment Fritz Burkard, in dals ertavels da las aczias da Sika, era laschà fabritgar tranter auter in nov restaurant, ina bar ed in nov museum da bob e skeleton. Entant ch’il kino ed il restaurant vegnan inaugurads questa fin d’emna è la bar ed il museum anc in construcziun e previs dad avrir proxim onn.