Siglir tar il cuntegn
cuntegn

Engiadina Kurt Baumgartner da Scuol – hotelier da l'onn 2018

Per la quarta giada è vegnì surdà il premi e per l'emprima giada ad in Grischun – a l'hotelier Kurt Baumgartner, che ha ils trais hotels Belvedere, Guardaval e Belvair a Scuol.

Legenda: Guardar il video Kurt Baumgartner è hotelier da l'onn. Durada 01:52 minutas.
Or da Telesguard dals 28.11.2018.

L'istorgia da success da Kurt Baumgartner e Scuol ha cumenzà ils onns 90. La construcziun dal Bogn Engiadina Scuol e pli tard l’avertura dal tunnel dal Veraina han dà a Kurt Baumgartner l’impuls da cumprar l’onn 1999 l'hotel da tradiziun Belvedere amez Scuol. Dapi lura ha el investì – tant cun blera passiun sco er cun grond ristg – blers milliuns en questa chasa.

3 hotels, 165 engaschads ed 80'000 pernottaziuns ad onn

Uss, radund 20 onns pli tard, posseda el er ils hotels Belvair e Guardaval. Tuts dus èn situads en la vischinanza dal Belvedere. Grazia a l'engaschi da Kurt Baumgartner stattan oz radund 165 collavuraturas e collavuraturs en la regiun – e quai sur l'entir onn.

Hotelier da l'onn

Personen-Box aufklappenPersonen-Box zuklappen

Cun il premi «Hotelier da l'onn» duain vegnir onuradas mintg'onn persunalitads ch'èn sa profiladas aifer la branscha entras success ed innovaziun. Purtaders da l'occurrenza èn hotelleriesuisse, l'Ecole Hôtelière de Lausanne e da nov er da la VDH (Vereinigung diplomierter Hoteliers).

Ses trais hotels èn daventads in dals facturs economics centrals en l'Engiadina Bassa. Els genereschan annualmain radund 80’000 pernottaziuns.

«In dals pli innovativs en Svizra»

Kurt Baumgartner saja daventà hotelier da l'onn causa ch'el tutgia segiramain tar ils hoteliers cun grond success e saja in dals pli innovativs en Svizra, argumentescha la schuria sia decisiun. Il titel «Hotelier da l'onn 2018» è vegnì surdà en il Bernhard Theater a Turitg.

Sper Kurt Baumgartner eran anc nominads Reto Invernizzi da l'hotel Kemmeriboden-Bad a Schangnau e Nathalie Seiler-Hayez da l'hotel Beau-Rivage Palace a Lausanne.

Legenda: Guardar il video Kurt Baumgartner – in portrait. Durada 03:26 minutas.
Or da Telesguard dals 27.11.2018.

RR novitads 22:00