Siglir tar il cuntegn

Header

glatsch cun scuas
Legenda: Il president da la Coppa Romana, Gregor Reich (dretga) en funcziun da nettagiader da glatsch RTR, A. Caprez
cuntegn

Engiadina L’aura cumonda a la Coppa Romana a Silvaplauna

Durant il pli grond turnier da curling sut tschiel avert en l'Europa han ils organisaturs ed er las 76 squadras che sa participeschan a la Coppa Romana adina puspè da s’adattar a l’aura.

Causa ch’i ha naivì intensivamain durant l’emprim di dal turnier da curling tradiziunal, han ins gì da spustar adina puspè il cumenzament dals gieus da la Coppa Romana. Ils bun 300 giugaders han gì d’avair pazienza.

Spetgar passa 6 uras

Enstagl da giugar l’emprim gieu la damaun, è finalmain curlà l’emprim crap pir enturn il suentermezdi sur il glatsch natiral a Silvaplauna cura che la naiv na crudava betg pli uschè intensivamain da tschiel. Las 76 squadras han perquai gì da spetgar in mez di en las differentas ustarias e sa trategnair cun giugar a cartas da jass e star da cumpagnia.

Suar ed organisar

Per il president dal comité d’organisaziun, Gregor Reich e ses gidanters signifitga l’aura variabla adina puspè ina nova sfida. Betg be las infurmaziuns han da rivar tar tut ils participants da la Coppa Romana, era il glatsch ha da vegnir pulì adina puspè a maun durant ils gieus. Ina lavur ch’il president surpiglia er gugent sez. Be grazia a l’engaschament da tuts funcziuna il turnier insumma dapi 48 onns ha suttastritgà Reich.

Istorgia cun tradiziun

La Coppa Romana avev’ins creà dal 1968 per generar pernottaziuns a Silvaplauna e conturn durant l’ominusa fora da schaner. Entant maina il turnier da curling bun 1200 pernottaziuns a la regiun durant almain quatter dis. E la glista da spetga per sa participar a la Coppa Romana, ch'è limitada sin 76 squadras, saja anc adina lunga, ha tradì Gregor Reich.

Artitgels legids il pli savens

Scrollar a sanestra Scrollar a dretga