Ils davos quatter onns èn ils passlunghists chaminads en il stil classic numnadamain be ina varianta scursanida. Per l’organisaziun da la cursa da passlung signifitga quai ch’i dovria era dapli voluntaris per il traject tranter Schlarigna e San Murezzan. Da quella part avevan ins stuì desister las davosas ediziuns da «La Diagonela», causa mancanza da naiv.
Forzas unidas
Radund 250 persunas funcziuneschan sco voluntaris da la cursa da passlung lung. Tiers vegnan anc las gruppas da lavur communalas che gidan a realisar l’eveniment en l'Engiadina. Tenor il president dal comité, Ramun Ratti, dovri quest onn var 20 fin 30 persunas dapli per organisar bain la cursa.
Tut è bunamain pront
Il traject da la cursa da passlung sa preschenta sin tut la lunghezza da 65km en in fitg bun stadi. Naiv dettia en abundanza, uschia Ratti. L’arriv da «La Diagonela» è entamez il center da la vischnanca da Zuoz. Perquai han ins da purtar naiv sin la via maistra e transmidar quella per in di en ina loipa da passlung. Quai dovra radund 400 meters cubic naiv. Naiv ch’ins aveva ramassà e producì cun chanuns dador vischnanca. Auter che normalmain tar navaglias, èn las maschinas perquai vid il emplenir il traject cun naiv.
Gronds sforzs per il bel maletg
La sfida saja surtut da realisar la transfurmaziun da radund 500 meters via en ina loipa, uschè svelt sco pussibel. Fin venderdi saira han tschertas parts ed access da vias anc da restar accessiblas als autos, ha declerà il schef infrastructura, Thomas Pinchera. Gia bunamain in’emna avant hajan el e ses voluntaris era cumenzà cun trair lingias ch’i dovria per forza electrica e tut las installaziuns da cameras, tavlas e computers – meters e meters. La cursa vegn numnadamain er emessa en differents chanals da televisiun. Tut ils sforzs rendan dentant, uschè Pinchera. Las reacziuns dals passlunghists da passar tras ina vischnanca istorica e rivar en l’arriv entamez Zuoz, sajan adina puspè nunemblidaivlas.
Blers passlunghists dal nord
Il numer d’annunzias per las trais differentas versiuns da la cursa da passlung sajan tar radund 1’000 persunas entant in pau sut las aspectativas. Ils participants derivan per gronda part dals pajais dal nord.
- La Diagonela 65 km (Zuoz-Schlarigna-San Murezzan-Puntraschigna, Samedan-Zuoz)
- La Pachifica 30 km (Zuoz-Puntraschigna-Zuoz)
- La Cuorta 11 km (Zuoz-S-chanf-Zuoz)
Factur aura decisiv
Malgrà la blera naiv ch'è quest onn avant maun, fan las previsiuns da l’aura er quest onn rumpatesta a l’organisaziun. Ramun Ratti è dentant da buna speranza, che la cursa possia avair lieu senza restricziuns causa privels da lavinas u grondas navaglias.
RR actualitad 07:00
