Siglir tar il cuntegn

Header

Navigaziun

Purtret d'in pestgader dasper in flum.
Legenda: A l'En faschess in'aua gronda bain. ovras electricas e responsabels da chantun e parc naziunal pondereschan da lavar or il flum cun in'aua gronda artifiziala. Keystone
cuntegn

Engiadina L'En duvrass in'aua gronda

Gia il 2017 è stà in schlet onn da pestga en Grischun. L'onn 2018 perfin in onn da record negativ. Anc mai han ins piglià en Grischun uschè pauc sco l'onn passà. L'En è in dals flums gronds nua ch'ins ha pestgà uschè pauc. In'aua gronda pudess schliar il problem.

La raschun principala ch'igl ha gì paucs peschs en l'En è ch'igl ha dà bovas ch'èn vegnidas giu en il flum ed han uschia purtà belma e glera en l'En. Vitiers vegn ch'igl ha dà naginas auas grondas l'ultim temp, quai ha declerà Marcel Michel da l'Uffizi da chatscha e pestga dal Grischun al schurnal regiunal da SRF.

Co lavar ora il flum

D'intervegnir qua saja grev, ha declerà Michel. Tuttina è il chantun vi da ponderar, co ch'ins pudess dumagnar in zic moviment en il flum ed uschia dumagnar ora ina part da la belma, il sablun e la glera. L'idea è da chaschunar in'aua gronda artifiziala. Cun las ovras electricas, responsabels dal Parc Naziunal Svizzer ed experts dal chantun han ins empruvà d'eruir, sche quai fiss insumma realistic, da lavar ora in pau l'En. La gronda finamira e speranza è da vegnir da deliberar tscherts lieus dal material. Uschia avessan ils peschs puspè a disposiziun lur ambient da viver.

Stads chaudas èn er problematicas

Vitiers spera Michel er, ch'i na dettia betg pli uschè chaudas stads sco l'onn passà. Entras la chalira sajan ils glatschers numnadamain luads fitg ferm. Entras quell'aua vegnia l'aua en ils flums turbla e quai fetschia grev da pestgar. Era quai è in motiv che pli paucs peschs èn vegnids pestgads l'onn passà.

RR actualitad 17:00