En il fegl uffizial dal chantun Grischun è publitgada oz l'annunzia che la dretgira districtuala En ha declerà il concurs dal hotel Schweizerhof a Sta. Maria en Val Müstair. Il hotel è gia serrà durant l'entir enviern.
Gronda perdita per la Val Müstair
Il hotel Schweizerhof è cun radund 60 stanzas in dals pli gronds hotels en Val Müstair, ina chasa da tradiziun. Sche quest hotel resta serrà è quai in culp per il turissem en Val Müstair. Il Schweizerhof ha generà durant ses megliers temps fin 6000 pernottaziuns l'onn. Quai èn radund 10% da las pernottaziuns da tut ils hotels en Val Müstair. La stad passada ha il hotel gì 4500 pernottaziuns, quai tenor indicaziuns da la vischnanca da Val Müstair. Il hotel ha procurà per radund 10 plazzas da lavur.
Ina specialitad da l'hotel Schweizerhof eran emnas cun curs per glieud cun chauns durant la stagiun da stad.
