Siglir tar il cuntegn
cuntegn

Engiadina L’introducziun dal «formular blau» è reussida

Ils chatschaders grischuns han gì da declerar en scrit il viadi dal sajet enfin tar il mazler. L’emprima evaluaziun è positiva.

La marca vi da la chomma da l'animal.
Legenda: La marca vi da la chomma da l'animal. RTR, Casper Nicca

Tranter 600 e 700 animals ha il veterinari da Scuol Men Bischoff controllà durant la chatsch‘auta en l'Engiadina Bassa. Be in tschierv ha el stuì allontanar. Tenor Bischoff haja l’introducziun funcziunà fitg bain.

A era mintgatant er B

Natiralmain haja er dà discurs intensivs tranter veterinari e chatschader. Betg adina era in animal classifitgà «A» era restà in «A». Suenter ch'il mazler ha tratg giu la pel ins ha constatà qua e là ina botta u ina rebattida e lura ha el stuì curreger sin «B». Il chatschader ha il dretg da far recurs sin la decisiun, ma recurs èn betg enconuschents a Men Bischoff.

Experientschas positivas

Questa controlla tras il veterinari haja consequenzas positivas: Men Bischoff è persvadì che blers chatschaders hajan sa dà dapli fadia per pudair dar in sajet mortal.

L’onn da chatscha 2018 e vegnida inoltrada questa nova pratica. Tut ils trais partenaris pertutgads, sia quai il veterinari, il chatschader ed era il mazler, ston ussa evaluar l’emprim onn. Men Bischoff spetga natiralmain correcturas in vista al proxim on da chatscha, ma l’introducziun e reussida.

RR actualitad 17:00