A Scuol datti puspè il pitschen open air A l'En. In festival intim, quest onn sin in areal sco en ina stiva. L'open air a l'En è in pitschen festival che pretenda grond engaschament dals organisaturs. E mintga ediziun savess esser l'ultima.
Venderdi saira han ils organisaturs stuì viver cul fatg ch'i ha pluvì a tut pudair. Uschia han ils interprets sco Paulin Nuotclà stuì sa cuntentar cun pauc public. L'atmosfera sin l'areal construì sco ina spezia da stiva era dentant fitg buna e relaxada.
Cura ch'ils organisaturs han fabritgà si l'infrastructura han ins anc sperà che l'aura fiss sco durant la construcziun dal palc e da las tendas. La bella aura da stad fitg chauda è dentant ida a fin exact cun ils prims tacts dal concert da Paulin Nuotclà.
Ils organisaturs speran ussa che la bun'aura turnia per il segund di dal festival che preschenta bands sco Stämpf u Flava & Stevenson.
