El vuleva gist far ina pitschna pausa, cura ch'el ha vis la bova. Uschia raquinta l'ustier Fredy Bass sias impressiuns da glindesdi saira. Immediat ha el bandunà il bajetg, ha alarmà ils pumpiers ed infurmà ils giasts da l'hotel.
Igl è in grond donn – ils tschalers èn emplenids cumplainamain cun material.
Quant grond ch'il donn è per l'ustaria Buffalora, na po Fredy Bass anc betg dir. El spera en mintga cas da pudair avrir ses hotel anc ina giada avant ch'ir en pensiun l'october.
Via è puspè averta
Dapi glindesdi saira era la via sur il Pass dal Fuorn serrada pervia d'ina bova. Dapi las 12:30 è la via però puspè averta, suenter ch'ella ha pudì vegnir rumida en il decurs da l'avantmezdi.
Donns materials anc betg enconuschents
Anc saja grev da discurrer da las dimensiuns da la bova. Peder Caviezel da l'Uffizi da construcziun bassa stima ch'i saja vegnì a val radund 10'000 meters cubic material – quai en dus lieus. Il material ch'è vegnì giu a Buffalora haja donnegià l'hotel Buffalora, ils tschalers sajan emplenids cun aua e material. Quantifitgar ils donns na saja betg anc pussaivel – persunas n'èn betg vegnidas a donn.
La bova è vegnida a val glindesdi saira vers las 18:00 suenter ch'i ha dà ina daratga intensiva. Cunquai che l'aura è puspè sa quietada na quinta il chantun betg cun ulteriuras bovas. Uschia ch'i cuntinueschan cun las lavurs da rumida enturn la via e l'hotel Buffalora.