Siglir tar il cuntegn
cuntegn

Engiadina La Biosfera Val Müstair ha mo futur naziunal

La Confederaziun na vesa naginas schanzas per salvar il label internaziunal da l'Unesco per la Biosfera Val Müstair.

Legenda: Guardar il video Biosfera ha sulet in avegnir naziunal. Durada 01:35 minutas.
Or da Actualitad video dals 15.06.2015.

Ils turistichers engiadinais èn dischillus dal na encunter la zona da tgira per il Parc naziunal che fiss stada necessaria per salvar il label Unesco per la Biosfera Val Müstair. E la Confederaziun accepta la decisiun da S-chanf e Zernez e na vesa ussa betg pli schanzas da tuttina anc realisar la zona da tgira.

La destinaziun Engiadina regiun Parc Naziunal di che la perdita dal label Unesco engrevgescha la lavur dad acquirir turists per la regiun. Il label Unesco saja stà in ferm argument per sa differenziar dad autras regiuns e per accentuar in turissem natiral.

Label Unesco n'è betg pli da salvar

L'Uffizi federal d'ambient Bafu na vesa ussa betg pli pussaivladads da mantegnair il label internaziunal da l'Unesco per la Biosfera Val Müstair Parc Naziunal. La decisiun da las vischnancas da Zernez e S-chanf saja dad acceptar ha ditg Matthias Stremlow, manader da secziun dal Bafu. La Unesco vegnia perquai a proponer da stritgar la Biosfera Val Müstair Parc Naziunal da la glista internaziunala da reservats da biosfera.