La veglia butia è stada vis-à-vis da l'ufficina che sa chatta en il vegl ospital orasum Samedan. Ella n'è betg stada bain visibla ed ha cun quai attratg mo clientella ch'ha enconuschì gia la butia. En pli ha Movimento stuì pajar fit là, sco Andrea Parolini, ch'è responsabel per la communicaziun, ha declerà ad RTR.
Durant ils davos 10 onns ha la butia damai scrit onn per onn cifras cotschnas e quai na po la societad betg pli sa prestar.
Il chantun pretenda respargns
Cun la nova lescha d'integraziun da persunas cun impediments pretenda il chantun, che Movimento optimeschia las finanzas per survegnir era en avegnir sustegn dal maun public.
La societad ch'ha ufficinas e gruppas d'abitar per persunas cun impediments a Samedan, Scuol, Val Müstair ed il Puschlav, ha perquai decidì tranter auter che las ufficinas duain lavurar en avegnir economicamain, vul dir almain zugliar ses custs.
Midada en l'atgna chasa
Cun la midada da la butia en l'atgna chasa vul Movimento cuntanscher quai. La Chesa Dosch tutga numnadamain dapi blers onns a la societad e porscha gruppas d'abitar per persunas cun impediments. Pli baud è la chasa stada in'ustaria avant ch'ella è daventada ils onns 60 il dachasa da fugitivs tibetans.
L'avertura da la nova butia è en sonda, ils 15 da settember.
RR actualitad 17:00