La cuppa mundiala da freeski sin il Corvatsch in di pli baud

Atletas ed atlets da 23 naziuns sa mesiran gia quest venderdi en la disciplina freeski in Engiadin’Ota. Planisadas eran las cursas stadas sin sonda. Er quest onn han ils skiunzs da surmuntar differents obstachels. La trid'aura è in ulteriur da quels.

L'obstachel da la trid'aura spetgada sin sonda ha motivà ils organisaturs da laschar partir ils skiunzs gia in di pli baud als finals.

Ed er las qualificaziuns per la cuppa mundial han ils atlets dad absolvar gia in di pli baud. Perquai che las previsiuns da l'aura annunzian naiv per sonda, han las cumpetiziuns da qualificaziun gia lieu la gievgia sin il Corvatsch.

Lavur intensiva per realisar percurs

Per che l’architect dal percurs, Kobi Würsch e ses team han pudì realisar tut ils differents sigls per ils sportists a temp, haja vulì in engaschament da di e notg durant las ultimas duas emnas.

Causa mancanza da naiv hajan ins gì da producir naiv cun chanuns. Nov fa part er l’uschenumnà «Bowl» al percurs. In obstachel in furma d’in «S» collià cun in sigl. En tut han ils atlets da surpassar set differents obstachels.

Pront per flips e jumps

Il percurs per il cup mundial è uss pront ed ils atlets èn vi dals ultims trenaments. Durant la cumpetiziun siglian els tranter 18 fin 23 meters lung cun skis che han pizs davant e davos. Oravant tut stat tal sport da freeski la concentraziun. Per obtegnair quella treneschan ils sportists consequentamain.

0:00 min, dals 21.11.2017

Favurits a la partenza

Tar ils megliers skiunzs da Slopestyle èn da la partida numerus favurits. Tranter auter il victur 2015 Felix Stridsberg-Usterud da la Norvegia u er ils dus Americans Joss Christensen e Nick Goepper. Schanzas sin in plaz da podest han dentant er ils Svizzers. Per exempel il champiun mundial Fabian Boesch u er Andri Ragettli e Luca Schuler. Tar il cup mundial Corvatsch vegn eruì il victur da las cursas da FIS ed i va per in premi da 50’000 francs.