La situaziun actuala cun la naiv na vess betg d’impedir la cursa da La Diagonela che ha lieu questa fin d’emna en Engiadin’Ota. Tenor Ramun Ratti, il president dal comité d’organisaziun, è l’infrastructura installada e pronta. Uss duain ins simplamain spetgar ch’i smetta da naiver. Oz suentermezdi vegnan tratg lavinas als lieus periclitads ed alura po vegnir preparada la loipa per la cursa da passlung sur 65 kilometers en il stil classic.
Traject scursanì pussaivel
L’unic midament ch’i pudess dar tenor Ramun Ratti, è ina pitschna correctura dal traject. Concret duain vegnir sviads lieus periclitads da lavinas sin la part tranter Zuoz e S-chanf. Vul dir che la stritga originala vegniss scursanida per 2 – 3 kilometers. Il comité d’organisaziun decida oz a mezdi davart quell’adattaziun.
