Il cussegl communal da San Murezzan ha ditg na ad in credit supplementar dad 8,4 milliuns francs per fabritgar la nova schanza per siglir cun skis.
La dumonda da credit è stada necessaria suenter che examinaziuns pli precisas avevan mussà che la schanza vegn a custar radund 20 milliuns francs e betg 11,5 milliuns francs sco prevesì oriundamain. La populaziun da San Murezzan aveva ditg gea al credit dad 11,5 milliuns francs ils 24 november 2013.
La fin da la schanza San Murezzan?
Il cussegl communal ha dentant decidì da laschar votar la populaziun davart il credit supplementar. Il cussegl communal recumonda dentant in na a la populaziun. La votaziun è ils 25 da settember.
Actualmain è il lieu, nua che la schanza veglia era e la schanza nova fiss vegnida fabritgada, in plazzal da fabrica. Florio Motti da la cumissiun da schanza da San Murezzan ha ditg envers Radiotelevisiun Svizra Rumantscha ch'ins guardia pir suenter la votaziun dals 25 settember co i va vinavant cun quest areal.
Gea a credit supplementar per planisar chasa da tgira Du Lac
En pli ha ditg gea il cussegl communal ad in nov credit da planisaziun per ina chasa da tgira sin l'areal Du Lac. Il credit importa ussa 2,3 milliuns francs per la vischnanca da San Murezzan empè dad oriundamain radund 2 milliuns francs.
Il credit pli aut è vegnì necessari suenter che la vischnanca da Puntraschigna aveva ditg na a la participaziun al project. Ussa planiseschan las vischnancas da San Murezzan, Silvaplauna e Segl la nova chasa da tgira Du Lac. Silvaplauna aveva gia ditg gea ad in credit pli aut, Segl ha ditg gea ad in credit da planisaziun pli aut gievgia saira.
RR actualitad 12:00+