Telefonins cun in abunament da la Swisscom n’avevan betg dapertut a Bever colliaziun cun la rait. L’interpraisa aveva pervi da quai inoltrà ina dumonda per montar in’antenna sin il territori da Bever. Cunter quel intent avevan sa dustads ils Beverots.
Vulì impedir nova antenna
Tant la suprastanza communala sco era ina gruppaziun d’indigens avevan fatg plant encunter l’installaziun d’ina antenna sin il territori da Bever. Els avevan perfin smanatschà a la Viafier Retica da procurar ch’il label d’Unesco na valess pli sch’ins installass in’antenna sin il territori da Bever.
Nagina schanza avant dretgira
Sco che la presidenta communala da Bever, Ladina Meyer ha declerà a Radiotelevisiun Svizra Rumantscha haja la vischnanca bain sclerì las pussaivladads ch’i dess per evitar l’installaziun d’ina antenna, dentant haja il Tribunal administrativ chantunal declerà, che la vischnanca n’haja nagina schanza. Quai surtut cunquai ch’il lieu previs per l’antenna sa chatta sin territori da la vischnanca da Samedan.
Colliaziun da 3G/4G dapertut
Dapi il schaner da quest onn è l’antenna entant installada. Ch’ella haja infurmà la radunanza communala da Bever, ha agiunt Ladina Meyer. Fin uss n’haja ella udì naginas reclamaziuns ord la populaziun davart l’implant a l’ur da Bever. Unicamain ella sezza sa giavischass mintgatant ch’il telefonin na scalinass trasora, grazia a la buna colliaziun cun la rait, garantida tras la nov’antenna a Bever.
