Siglir tar il cuntegn

Header

cuntegn

Engiadina La gruppa Foffa Conrad sa defenda

I n'haja betg dà uschè blers cas da cunvegnas sco quai che la Weko pretenda. I n'haja betg dà ina collavuraziun sistematica cun l'interpresa Lazzarini. Ed oravant tut n'hajan ils impressaris betg manipulà ils pretschs.

Ditg n'ha la gruppa Foffa Conrad ditg nagut suenter che la Weko aveva publitgà ils 26 d'avrigl sia decisiun en il cas «Engiadina 1». La gruppa Foffa Conrad survegn en quella decisiun in chasti da radund 5 milliuns francs.

Naginas manipulaziuns da pretschs

Roland Conrad, il president dal cussegl d'administraziun da la gruppa Foffa Conrad defenda ussa sia interpresa. El di surtut ch'ins n'haja mai manipulà pretschs. Che quai avessan remartgà immediat architects, inschigners ed era las instanzas chantunalas. Ultra da quai saja era il fatg che radund la mesadad da las interpresas da fabrica en Engiadina Bassa ed en Val Müstair hajan fatg concurs durant ils ultims 20 onns, in indizi ch'ils pretschs eran plitost memia bass che memia auts.

audio
Mezdi: La gruppa Foffa Conrad sa dosta cunter chasti da la WEKO
ord Actualitad dals 24.05.2018.
laschar ir. Durada: 4 minutas 30 Secundas.

Betg tants cas da cunvegnas

La gruppa Foffa Conrad sa dosta era cunter la renfatscha ch'igl haja dà radund 400 cas da cunvegnas. Quai haja la Weko calculà a basa da protocols ed agendas dad involvids. Betg tar mintga sesida haja dentant dà cunvegnas, perquai ch'ins haja savens era fatg dispita senza la fin finala chattar in consens. Era las collavuraziuns cun l'interpresa Lazzarini na sajan betg stadas sistematicas sco quai che la Weko pretendia, ha ditg Roland Conrad envers RTR.

Recurs

La gruppa Foffa Conrad fa ussa recurs tar il Tribunal administrativ federal. L'interpresa spera ch'il tribunal curregia las decisiuns da la Weko. Surtut era l'autezza dal chasti per Foffa Conrad, da 5 milliuns francs, saja absurda ha ditg Roland Conrad. En il cas che l'interpresa avess propi da pajar tut l'import, signifitgass quai in privel existenzial.

La Weko na commentescha betg

La cumissiun da concurrenza Weko na vul betg commentar ils arguments da la gruppa Foffa Conrad. Quai ha ditg il vicedirectur da la Weko Frank Stüssi ad RTR. Els restian tar quai che els hajan ditg la fin d'avrigl en la communicaziun da medias.

Il pli grond cartel en la branscha da construcziun

Avrir la box Serrar la box
Legenda: ANR, Flurin Andry

Qua datti ina survista.

RR actualitad 12:00

Artitgels legids il pli savens