Siglir tar il cuntegn
cuntegn

Engiadina La pli gronda reuniun da classa dal tschientaner

Il 1793 è la scola ch'è oz l'Institut Otalpin Ftan vegnida fundada. Cun concerts ed attracziuns è il giubileum da 225 onns vegnì festegià la fin d'emna.

Il giubileum ha attratg anteriurs scolars da tut las vegliadetgnas, da datiers e da lontan. Tranter auter è la mesadad da la classa da matura dal 1968 sa scuntrada questa fin d'emna a Ftan. Las quatter dunnas eran vegnidas cun 12 onns a Ftan a l'Institut superiur per figlias. Tuttas eran figlias da Svizzers che vivevan a l'exteriur, ellas èn vegnidas da l'India, da l'America u da la Frantscha.

D'ina scola da mattas ad ina era per mats

Enfin il principi dals onns 1970 era la scola exclusivamain per mattas. Suenter han lura era mats pudì frequentar la scola. D'avrir la scola era per mats saja stà ina buna decisiun è Annegret Gallmann anc oz persvadida. Ella è stada dal 1971 fin il 1992 ensemen cun ses um la directura. I saja stà in enritgiment per tuts.

Da tuttas sorts regurdientschas

Durant la festa da giubileum èn vegnidas raquintadas ina massa regurdientschas. Jon Erni da «Mia Engiadina» per exempel sa regorda, ch'el haja vulì savair durant ses entir temp da scola, co ch'i vesia ora en l'internat ch'era tabu per ils mats. Pir suenter la matura haja el lura ristgà da far in pass en ina da las stanzas.

Ubain Nevin Galmarini, il campiun olimpic da snowboard alpin, che raquinta che perfin sia classa da sport haja rebellà mintgatant durant las lecziuns da gimnastica. Empè da far per exempel sigl en aut, hajan els simplamain preparà tut per giugar unihockey.

Ina scola cun ina istorgia animada

Il 1793 è l'institut vegnì fundà dal plevon e magister indigen Andrea Rosius à Porta. Cun 18 scolars ha el cumenzà l'instrucziun en il Palazzo amez vischnanca. Il 1869 ha la scola stuì vegnir serrada pervia da memia paucs scolars.

Il settember 1916 è vegnì inaugurà il nov edifizi per l'Institut superiur da figlias. Dapi l'onn 1993 sa numna la scola «Institut Otalpin Ftan» e dapi lura è era l'internat avert per mats.

RR actualitad 06:00