Che La Punt Chamues-ch po beneventar puspè cun l’etappa roiala la pli pretensiusa etappa da la cursa è per il comité d’organisaziun da gronda muntada. Cun quai che la vischnanca ha organisà pli u main mintga quatter onns in arriv d’etapp, saja la lavur daventada pli simpla, per part gia rutina, ha declerà Ralf Fluor, il schef per l’infrastructura, traffic e segirezza a La Punt.
Dapli segirezza ch'anc avant onns
Midà en congual cun l’emprima ediziun d’in arriv d’etappa dal Tour de Suiss a La Punt l’onn 1992 saja surtut l’aspect da segirzza. Il dispositiv da persunas che surveglian e controllan l’areal saja marcantamain pli grond. Quai prescriva er il chantun tar eveniments da tala grondezza, ha agiuntà Ralf Fluor. El è responsabel per totalmain 55 persunas ch’èn en acziun durant quests dis.
En munaida è in arriv dal Tour de Suisse betg da valitar, dentant signifitga l’eveniment per La Punt ina reclama nunpajabla.
Tut ils sforzs e las installaziuns che la vischnanca fa per organisar in eveniment perfect valia segir la paina èn persvas tut ils involvids. La Punt Chamues-ch fa quint cun 2’500 fin 3’000 aspectaturs a la cursa cun bun 170 curridurs.
Il budget da 120’000 francs vegn d'ina vart purtà da sponsurs, da l’autra erda la vischnanca, il turissem e dal Club 92 ch'aveva inizià a La Punt sco lieu d’etappa. Già la segunda giada surpiglia la vischnanca da Zernez la partenza da la proxima etappa dal Tour de Suisse suenter l'arriv a La Punt Chamues-ch.
-
Bild 1 von 6. Las pretaisas da l'organisaziun dal Tour de Suisse èn fitg autas a reguard segirtad e comfort. Bildquelle: RTR, Ulrica Morell .
-
Bild 2 von 6. La vischnanca survegn er sustegn da la defaisa civila che metta a disposiziun persunas. Bildquelle: RTR, Ulrica Morell .
-
Bild 3 von 6. Ultimas infurmaziuns per il persunal. Bildquelle: RTR, Ulrica Morell .
-
Bild 4 von 6. Ralf Fluor e Ralph Böse durant in cafè per discutar ils ultims detagls avant l'arriv da l'etappa roiala. Bildquelle: RTR, Ulrica Morell .
-
Bild 5 von 6. Ralph Böse vi da las ultimas preparativas avant ch'i rivan a La Punt Chamues-ch. Bildquelle: RTR, Ulrica Morell .
-
Bild 6 von 6. Tut survegn anc il bul da la destianziun Engiadina San Murezzan. Reclama è fitg impurtanta per Ralph Böse. Bildquelle: RTR, Ulrica Morell .
Program da divertiment
Dasper l’arrivada dals curriders dal Tour de Suisse a La Punt sco tal porscha la vischnanca ia a partir da las 14:30 in program per ils visitaders. Suenter la cursa envida La Punt ad ina festa cun musica e saut en la tenda cun la «Chapella Blazenka».
Cun passar sur il pass da l’Alvra, ina part dal Patrimoni cultural mundial da l’Unesco, daventa la 6avla etappa da la cursa da Locarno - sur bun 166 km - fin a La Punt Chamues-ch in dals puncts culminants dal Tour de Suisse 2017.
RR actualitad 17:00++