L'InnHub La Punt vegn construì dapi la primavaira 2025 e duai daventar in impurtant campus d'innovaziun en l'Engiadina. Cun sia finiziun l'onn 2028 vegnia el a daventar in lieu da creaziun, barat e transfurmaziun per indigens, giasts e interpresas da l'entir mund. Quai han ils 6 investiders dal project che vegn a custar passa 100 milliuns francs, communitgà durant in act uffizial per l’emprima badigliada dal Innhub La Punt.
Construcziun en lain persistenta
Il project dal renumà architect Norman Foster prevesa in edifizi da dus plauns che vegn a porscher ina vasta paletta d'infrastructuras, tranter auter locals da conferenza e co-working, in restaurant, ina butia da sport ed abitaziuns turisticas. Per la construcziun dal Innhub La Punt vegnia mess grond pais sin la persistenza. Uschè vegnia duvrà lain indigen da differentas vals en Grischun, en tut radund 2'400 pins ch’èn gia smers il 2023 e vegnan elavurads a Tinizong e Savognin.
Emprims pass
Dapi il cumenzament dal fabricat, èn gia finidas emprimas lavurs centralas per l’edifizi che vegn ad esser marcant tras sias cuplas. Radund 15’000 meters cubic terra èn gia allontanads e la platta da fund è culada, l’access sutterran è er pront. Cun las lavurs en lain vegnia cumenzà la proxima stad. L’avertura da l’Innhub La Punt è prevesida per la fin dal 2028.
