Sco la vischnanca da La Punt Chamues-ch communitgescha saja l’iniziativa inoltrada valida cun 70 suttascripziuns verifitgadas. L’iniziant, Richard Hunziker pretenda che las autoritads ston laschar examinar dad experts ina reavertura da l'implant electric pitschen Chamuera. Ultra da quai duai vegnir sclerì tge reparaturas ch’i duvrass per reactivar l’ovra. Tar quella incumbensa tutgia er la part aquifera, l’enchaschament, la lingia da provediment, la chombra d’aua e la lingia da pressiun, uschè la pretaisa da l’iniziativa.
Populaziun duai decider
Ils resultats da las examinaziuns stoppian vegnir declerads e suenter suttamess als votants e las votantas da La Punt Chamues-ch. La finamira saja da puspè reactivar l’ovra. Saja quai sut l’egida da la vischnanca u er cun dar a fittanza ad in’ovra electrica.
Ultra da quai duain las fanestras dar en avegnir in’invista en l’edifizi a passants e passantas, tut tenor duessi perfin dar visitas guidadas en l’ovra.
Tenor il chanzlist da La Punt Chamues-ch, Urs Niederegger, veglia la suprastanza preschentar en ina da las proximas radunanzas communalas ina cuntraproposta. Quella sa basia sin in project ch’era vegnì preschentà il 2014.