La Punt Chamues-ch - Surbajegiada «Alvra» vegn realisada en duas etappas

Il project per ina surfabricaziun cun 21 abitaziuns per indigens a La Punt Chamues-ch vegn realisada en duas etappas. Quai ha ditg il chanzlist communal Urs Niederegger envers la FMR. La raschun è in recurs da possessurs da segundas abitaziuns cunter duas da las quatter chasas prevesidas. Las lavurs da construcziun per la emprima etappa avessan da cumenzar la primavaira che vegn – pia in onn pli tard che previs oriundamain.

Segundindigens tiran recurs davant Dretgira superiura dal Grischun

En il quartier Alvra a La Punt Chamues-ch – pia gist sur la staziun da la viafier ed en direcziun dal pass – avess atgnamain gia dapi questa primavaira da regnar in grond travasch. Almain è quai stà previs l’onn passà durant la planisaziun ed avant che la dumonda da fabrica è vegnida publitgada. Dentant ha quai dà in'opposiziun da segundindigens, ch'èn en possess d’abitaziuns gist sper la surfabricaziun previsa. Las quatter partidas han decis da trair vinavant il recurs a la Dretgira superiura dal Grischun.

Il recurs pertutga dentant mo duas da las quatter chasas planisadas. I sa tracta da las duas chasas ch'ins vul construir sin ina parcella che tutga a la vischnanca burgaisa. L'autra parcella betg cunfinanta tutga a la vischnanca politica. En connex cun il recurs fa Urs Niederegger quint da survegnir ina decisiun dal la Dretgira superiura dal Grischun questa stad u l'entschatta d'atun. Sch’il recurs cunter las duas chasas sin la parcella da la vischnanca burgaisa na vegnia betg tratg al Tribunal federal, possian ins forsa er gia cumenzar l’auter onn cun quellas.

La vischnanca da La Punt Chamues-ch vul gia dapi ditg realisar la surfabricaziun e contribuir activamain a diminuir la mancanza d’abitaziuns pajablas per indigens. La Punt Chamues-ch è stà ina da las primas vischnancas en l'Engiadin’Ota ch'è vegnida activa en quest connex. Perquai aveva la radunanza communala gia decis il december 2023 in credit da passa 13 milliuns francs per la surbajegiada «Alvra».

Grond interess per las abitaziuns

Per pudair garantir in bun pretsch, metta la vischnanca a disposiziun las abitaziuns en proprietad en condomini, dentant en dretg da construcziun. E per pudair evitar speculaziuns cun las abitaziuns, stoppian proprietaris vender enavos quellas a la vischnanca da La Punt Chamues-ch per il medem pretsch sco els han cumprà ellas. Ina part da las abitaziuns dat la vischnanca era a fit.

Ins haja gia passa 100 interessents per las 21 abitaziuns, di Urs Niederegger vinavant. Ins haja era adattà il project e reducì il dumber d'abitaziuns per pudair far intginas abitaziuns pli grondas.