Siglir tar il cuntegn

Engiadina La regenza grischuna na prova betg da salvar label Unesco

Il departament d'economia grischun na vegn betg activ per provar da salvar il label Unesco da la Biosfera Val Müstair.

Val Müstair cun nivels
Legenda: La Val Müstair duai vegnir sez ord las turbulenzas. La Val Müstair duai sez s'orientar danov suenter la perdita dal label Unesco per la Biosfera. RTR/D. Spinnler

La regenza grischuna na prova betg activamain dad evitar la perdita dal label Unesco per la Biosfera Val Müstair. Quai ha ditg il cusseglier guvernativ Jon Domenic Parolini envers Radiotelevisiun Svizra Rumantscha RTR. Ses departament d'economia saja la faussa adressa ed il departament da educaziun, cultura ed ambient che ha tgirà il dossier enfin ussa haja fatg buna lavur d'intermediaziun enfin ussa. Il chau dal departament d'educaziun, cultura ed ambient, cusseglier guvernativ Martin Jäger n'ha betg vulì prender posiziun davart questa dumonda.

Sviluppar sez novas strategias

Il departament d'economia deploreschia il fatg che la Val Müstair perda il label Unesco ha ditg Jon Domenic Parolini. La Val Müstair stoppia ussa dentant procurar sez per novs svilups.

La regenza saja da l'avis ch'ins stoppia acceptar las decisiuns democraticas da S-chanf e Zernez. Quellas duas vischnancas avevan votà encunter ina zona da tgira enturn il Parc naziunal.