Concret ha la Dretgira superiura decis che la runcada da radund 457 meters quadrats guaud per realisar in parcadi per radund 130 autos per la surfabricaziun la Sassa cuntrafetschia a la lescha. Uschia è l'approvaziun da la regenza vegnida abolida.
Tschels puncts che las recurrentas han fatg valair ha la dretgira refusà. Il project «La Sassa» haja senz’auter potenzial turistic e saja relevant per la Val Müstair. Il project na cunterfetschia era betg a la lescha da segundas abitaziuns.
Vischnanca è cuntenta cun la decisiun
La presidenta communala da Val Müstair Gabriella Binkert Becchetti na vesa nagin impediment en la decisiun da la dretgira. Che la runcada dal guaud saja ina gronda intervenziun en la natira saja cler e la decisiun po ella acceptar. Pli impurtant saja che la dretgira haja tractà il project minuziusamain ed ha acceptà tut las autras parts dal project.
Quel [la dretgira] ha ditg: La Sassa è ok, la pendiculara fitg buna ed era l'innovaziun fitg buna.
La dretgira haja mussà ch'il project è bun. Il pievel haja ditg Gea ed er il chantun ha approvà la Sassa. Per realisar parcadis dettia er autras pussaivladads e quellas sajan uss d'examinar e chattar la soluziun. Era la finanziaziun saja segirada, l'investur Domenig da Cuira saja vinavant interessà vi dal project e spetgia impazientamain da pudair cumenzar cun la construcziun.
Nagin vul ir avant Tribunal federal
Suenter avair evaluà la situaziun han las recurrentas decis d'acceptar la sentenzia e betg trair enavant il cas al Tribunal federal. Tant la Fundaziun svizra per la protecziun da la cuntrada sco era l'organisaziun Mountain Wilderness han ditg vers la FMR ch'i desistian d'ulteriuras acziuns. Tenor Franziska Grossenbacher da la Fundaziun per la protecziun da la cuntrada saja quai ì per mussar che la runcada integrada na saja betg legala. E quai saja fatg.
Quai munta che la sentenzia da la Dretgira superiura da la fin da mars po ir en vigur cun ils 9 da matg. Entant pon cuntinuar las lavurs da planisaziun e las lavurs da chattar in auter lieu per il parcadi.
Planisà è in resort da vacanzas
Tar il project la Sassa Val Müstair sa tracti da la realisaziun dad in resort da vacanzas a l'ur da la fracziun Tschierv, planisà dal biro d'architectura Domenig da Cuira. Quest resort vegniss fabritgà gist dasper la staziun da la pendiculara planisada, che manass sin il territori da skis «Minschuns».
Las organisaziuns da la protecziun da l'ambient, tranter quellas la Fundaziun svizra per la protecziun da la cuntrada e Mountain Wilderness, eran s'exprimidas cunter il project, perquai ch'ellas na vesian nagin basegn per in resort da questa grondezza.
