Siglir tar il cuntegn

Header

cuntegn

La Sassa / Val Müstair Sistì la procedura giuridica per far las lezias

Fin la fin dal 2021 è la procedura giuridica sistida. Ils Implants da sport SA Val Müstair vulan metter en net anc divers puncts e tschertgar anc ina giada la discussiun cun las organisaziuns d'ambient. La situaziun da corona haja retardà il project supplementarmain.

Il recurs da la Fundaziun svizra per la protecziun da la cuntrada e Mountain Wilderness encunter la revisiun parziala da la planisaziun locala davant la Dretgira administrativa dal Grischun è actualmain sistida. Quai ha il president da la dretgira confermà envers RTR.

Motiv saja tenor Daniel Pitsch, manader da gestiun dals Implants da sport SA Val Müstair, ch'ins veglia far anc intginas lezias e tschertgar anc ina giada la discussiun cun las organisaziuns d'ambient. Sche pussaivel vulan ins numnadamain evitar la via giuridica.

Enfin la fin da quest onn duai damai il plan d'utilisaziun cun la vischnanca esser en net. Enfin il schaner/favrer duai in plan da la vischnanca esser curregì, nua che la pista era vegnida messa en fauss avant 40 onns. En pli saja stà da lavurar ora in plan da gestiun per il vitg da vacanzas ensemen cun la famiglia Domenig che vegniss a fabritgar quel. E lura han ins era anc stuì instradar la procedura BAB per l'ennavaziun. Tut quai haja custà dapli temp che previs, conceda Daniel Pitsch. E la situaziun da corona haja retardà supplementarmain las discussiuns.

audio
Val Müstair: Project La Sassa-Minschuns
aus Sport ed actualitad vom 20.11.2021.
abspielen. Laufzeit 2 minutas 43 Sekunden.

Signals positivs

Uschiglio saja il project sin buna via. Divers rapports sajan en il decurs dal temp vegnids a la conclusiun ch'ins possia realisar ils projects La Sassa/Minschuns ecologicamain cumpatibel. E l'Uffizi federal da traffic haja era dà glisch verda per la concessiun da la pendiculara, a paina che la planisaziun locala saja legala.

Il project La Sassa/Minschuns prevesa ina pendiculara davent da Tschierv en il territori da skis Minschuns, in resort da vacanzas tar la staziun a val e l'ennavaziun da la pista fin giu en il resort.

RTR actualitad 17:00

Artitgels legids il pli savens

Scrollar a sanestra Scrollar a dretga