En Svizra avran las 42 meglras destillarias da vinars lur portas per il public. Trais da questas destillarias èn en il Grischun. Il public po sagiar pliras sorts da vinars e products culinarics sco per exempel fondue da Whisky u liongias da trester. L’idea è da sensibilisar la glieud per questa tradiziun e cultura ritga.
Mintga regiun ha si'atgna puma e sias atgnas ervas ed uschia era vinars tut spezial e destillarias specificas. Ina destillaria tut speziala è en la Val Puschlav a Brusio. Ella è ina da las paucas che dastga producir grappa en Svizra. Grappa è in destillat extraordinari. Il num grappa è in num protegì e sto vegnir producì cun trester d’iva da l’Italia.
Pietro Misani è viticultur e brischavinars a Brusio. Sias vignas èn paucs kilometers davent da Brusio però da l’autra vart dal cunfin svizzer en la Vuclina (I). Uschia è el in dals paucs brischavinars svizzers che dastga far grappa en Svizra.
