Siglir tar il cuntegn

Engiadina La Val Müstair sto renovar ses albiert da giuventetgna

L'albiert da giuventetgna a Sta. Maria exista dapi 50 onns. Ussa ston ins sanar la chasa uschiglio sto l'albiert serrar las portas.

la chasa
Legenda: L'albiert da giuventetgna a Sta. Maria en Val Müstair Michel van Grondel

L'albiert da giuventetgna a Sta. Maria po festivar ses 50avel giubileum. La chasa ha success e generescha radund 4300 pernottaziuns l'onn. Quai era sche l'albiert n'è betg avert durant l'entir onn. Ils Albierts da giuventetgna svizzers èn locataris da la chasa veglia amez Sta. Maria. La vischnanca da Val Müstair posseda la chasa. Dapi onns èsi cler ch'ins sto renovar e sanar la chasa. Ussa ston ins agir. Ils Albierts da giuventetgna svizzers han elavurà in project che custa tranter 1 e 2 milliuns francs. La finanziaziun è ussa chaussa da la vischnanca. Tenor la suprastanza communala èsi dentant cler ch'i sto esser pussaivel da finanziar la renovaziun. La vischnanca na possia betg permetter ch'ins perdess passa 4000 pernottaziuns l'onn ha ditg la suprastanta communala Gabriella Binkert Becchetti a Radiotelevisiun Svizra Rumantscha RTR.

chombra
Legenda: Ina da las chombras en ina stiva veglia da l'albiert Michel van Grondel