Dals 20 da december fin ils 13 da schaner avevan ils responsabels da l'uniun Bernina Glaciers previs da pudair avrir il Lago Bianco sin il pass dal Bernina. Glaziologs ed experts da segirezza avevan dà glisch verda, sche la cuverta da glatsch saja fin lura grossa avunda.
Uss haja la natira fatg in stritg tras il quint, ha ditg Kaspar Howald, il directur da Valposchiavo Turismo. Perquai ch'i saja vegnì fraid pir tard na saja il glatsch anc betg stà gross avunda, cura ch'ins haja mesirà la grossezza. E perquai ch'igl haja uss dà ina grossa cuverta da naiv sin il lai na possia quest glatsch er betg pli vegnir pli gross. Perquai na possian ins uss tuttina betg dar liber il lai per patinar. La segirezza na possia betg vegnir garantida.
RR novitads 15:00