Durant ils davos onns èn sa rimnads adina dapli sediments en l'uschenumnà «delta» dal Lai da San Murezzan, gist tar la sbuccada da l'En. Surtut tar l'aua gronda il zercladur 2019 era il delta creschì fitg. El ha entant cuntanschì la surfatscha dal lai.
Questa situaziun mainia ad in privel d'inundaziuns per San Murezzan Bagn, hai num en il project ch'è en consultaziun dals 10 da zercladur enfin ils 10 da fanadur 2022. En pli sajan las plantas d'aua en quest sectur dal lai per part zugliadas da sediments ed er la funcziun dal conduct da sfradentar da la plazza da glatsch Ludains saja restrenschida.
Plazzar en in auter lieu
Ils sediments, bundant 5'000 meters cubics, duain vegnir tschitschads davent e mess enavos en in auter lieu puspè en il lai. Quai è la premissa da l'Uffizi da chatscha da pestga, cunquai ch'i dat memia paucs sediments en il lai. Quai fiss però bun per ils peschs. Oriundamain era previs da transportar davent il material e da duvrar quel tut tenor sco material da construcziun.
Las lavurs han lieu il settember e custan a la vischnanca da San Murezzan 400'000 francs.
