Lai da Segl - Nov record: Sfunsar 52 m en la profunditad sut il glatsch
Aifer duas minutas è il Tschec David Vencl sfunsà 52 meters en la profunditad dal Lai da Segl. Quai è in nov record mundial. Ils responsabels dal Guinness World Record èn er stads al lieu per confermar il record gartegià.
L'aua sut il glatsch ha ina temperatura da circa 1 grad. Pli profund ch'ins va, pli chauda che quella vegn. Ma tuttina: La temperatura resta enturn 4 grads. Ed en quella aua ha il Tschec David Vencl fatg mardi, ils 14 da mars 2023 si'emprova da record curt suenter las 12:00: Aifer pli pauc che 2 minutas è el sfunsà 52 meters ed enavos. Il record è pia gartegià ed è er vegnì confermà dal Guiness World Record.
Impressiuns dal record
1 / 7
Legenda:
Plaina concentraziun
Avant che siglir en l'aua da be paucs grads (sut il glatsch 1 grad, pli profund lura 4 grads) vala quai da sa concentrar bain.
Miroslav Belancin
2 / 7
Legenda:
Pront...
Miroslav Belancin
3 / 7
Legenda:
...e gia vesan ins be pli la flossa
Miroslav Belancin
4 / 7
Legenda:
Fin ch'i ha num da spetgar
Il sfunsar en profunditad è fitg privlus. Perquai n'è betg mo il coach mental al lieu, mabain era, sper persunas da las medias, duas persunas dal Spendrament da l'Engiadin'Ota.
Miroslav Belancin
5 / 7
Legenda:
Suenter 2 minutas è David Vencl puspè enavos
Miroslav Belancin
6 / 7
Legenda:
Ma el ha problems da la sanadad
Cun turnar a la surfatscha sto l'um da 40 onns tusser sang. Pli tard era render sang. El è silsuenter en l'Ospital da l'Engiadin'Ota a Samedan per laschar intercurir.
Miroslav Belancin
7 / 7
Legenda:
Il record è gartegià
Malgrà problems da sanadad suenter arrivar puspè a la surfatscha dal lai vegn fatg in viva sin il record gartegià.
Miroslav Belancin
Però ha l'um da 40 onns gì da cumbatter cun problems da sanadad cura ch'el è turnà a la surfatscha: El ha gì da tusser e pli tard era render sang. Las persunas dal Salvament Engiadin'Ota ch'eran al lieu han pudì gidar ed organisar il contact. Silsuenter è David Vencl vegnì transportà ord motivs da precauziun en l'Ospital da l'Engiadin'Ota a Samedan. Sco quai ch'i vegn communitgà dal manager da David Vencl giaja quai bain cun el.
Betg emprima emprova
Sfunsar sut il glatsch è gia vegnì empruvà, però anc betg senza costum da neopren. David Vencl ha fatg uss il record be cun chautscha da bogn e nudaglias. Experientschas ha il Tschec gia; il 2021 è el nudà sut il glatsch 80 meters be cun chautscha da bogn ed egliers da sfunsar. Là è el nudà par lung dal glatsch e betg en la profunditad.
