En occasiun dal «Swiss Ice Hockey Day 2017» ha ina gruppa da 7 persunas enturn Marco Schmied, Andry Niggli e Gian Reto Staub cumenzà a ramassar suttascripziuns per l’iniziativa. Quella sa basa sin l’artitgel 25 dals statuts da la Regiun Malögia.
Tuts èn da medem’idea
Sco che Marco Schmied ha declerà vers RTR na saja quai insumma betg difficil da ramassar las 400 suttascripziuns basegnaivlas per inoltrar l’iniziativa. Che mintgin ch’els dumondian, saja dalunga pront da sustegnair l’iniziativa.
Basegn è grond ed urgent
Cun passa 300 hockeyans e numerus ulteriurs sportists sin glatsch, saja il basegn d’ina halla da glatsch dapi onns fitg urgent. Surtut cura che l’aura è bletscha u las temperaturas fitg bassas, na possian ins betg adina giugar per exempel in gieu da hockey. La reacziun da giugaders da squadras adversarias da la Bassa saja per part be pli in squassar il chau.
Trais mais temp
Lantschà l’iniziativa hajan ins cun grond success. La finamira saja da cuntanscher entaifer trais mais tranter 800 e 1’000 suttascripziuns per mussar l’impurtanza d’ina halla da glatsch en Engiadin’Ota.
RR novitads 17:00