Suenter “jau discur” – “jau chapesch”
La gruppaziun Samedrina ha laschà stampar in pin cun « jau chapesch rumantsch ». Quels 2000 tocs duain vegnir scumpartids dapertut. Surtut en lieus nua ch’ins è in contact cun glieud sco per exempel butias e restaurants.
Ils multiplicaturs da Puntraschigna avevan gia edì in pin sumegliond cun “jau discur rumantsch”.
Pliras reacziuns da persunas che enclegian la lingua rumantscha, na la discurran dentant betg, hajan uss intimà ils Samedrins da schlargiar il numer da pussaivels purtaders dal pin.
Sustegn da vischnancas
La vischnanca da Samedan haja entant gia cumprà in numer da pins e surdà quels ad interessads.
Retrair in pin pon ins tar la Lia Rumantscha a Zernez u er directamain tar la gruppa da multiplicaturs da Samedan, tar Andrea Urech.