Las scolas fan in pass en l’avegnir

En vista al regress da scolars ed a las pretaisas augmentadas dal chantun envers las scolas, ha ina cumissiun elavurà in model da collavuraziun per il stgalim superiur da l'Engiadina Bassa, Samignun e la Val Müstair.

Laschar ir video «Avegnir dal stgalim superiur»

Avegnir dal stgalim superiur

3:22 min, dals 13.11.2017

In studi, fatg per incumbensa da la Regiun Engiadina Bassa Val Müstair, vegn a la conclusiun che las scolas duessan cooperar dapli. Vul dir ch'i dovra in gremi da coordinaziun regiunal che lavura operativamain.

Causa las fusiuns da vischnancas, la diminuziun dal dumber da scolars e pretaisas pli autas envers las scolas en Grischun ha la regiun laschà far in studi. La mira era da metter a disposiziun als gremis politics ina basa da planisaziun e da decisiun per il stgalim superiur da las scolas.

La cumissiun ha examinà sequents models:

  • Mantegnair il provediment da fin qua cun sis scolas.
  • Sviluppar in model da cooperaziun cun structuras decentralas ed ina coordinaziun centrala.
  • Centralisar parzialmain cun reducir il dumber da scolas.
  • Centralisar il stgalim superiur en in lieu.

La cumissiun è vegnida a la conclusiun, ch'i saja prudent da realisar il model da cooperaziun. Uschia sappian ins garantir in provediment decentral, però cun ils avantatgs d’ina coordinaziun centrala. En pli possian ins sviluppar quest model tenor ils basegns.

La conferenza dals presidents da vischnanca è seguida la proposta da la cumissiun ed ha incumbensà quella d’elavurar quest model en detagl. Cura ch'il model è elavurà, sto quel en in emprim pass vegnir acceptà da la conferenza dals presidents e pir lura po mintga vischnanca decider davart la proposta.

RR actualitad 17:00