Siglir tar il cuntegn
Inhalt

Engiadina Laud naziunal: Premi da tgira per secziuns da chatscha da Scuol

Ina collavuraziun regiunala a favur da la natira e dals animals – quai è la raschun che las 5 secziuns da chatscha han survegnì il premi da tgira 2018 da l’uniun tetgala «Chatscha Svizra».

Gist trais projects han las tschintg secziuns da chatscha Tardana, Lischana, Plavna, Fasch’Alba e Tasna da Scuol inoltrà a la concurrenza naziunala sut il tetg da l’uniun «ChatschaSvizra» – i va per la collavuraziun en regiun e quai ha fatg impressiun a la giuria:

Project drona termica

Segir il project cun il pli grond interess è quel cun las dronas cun ina camera termica per chattar ils chavrielins, avant ch’il pur sega. Quest project è era da tempra chantunala. L’uffizi da chatscha e pestga Grischuna sa participescha al project per l'expander sur l'entir territori Grischun.

Il premi dotà cun 5'000 francs è vegni surdà ad Ardez. Da la partida eran delegads da las secziuns da chatscha, da l’uniun «Chatscha Svizra», da l'Uffizi da chatscha e pestga Grischun ed auters amaturs da la natira.

Legende: Video Dronas per chattar chavrielins avant ch'il pur sega abspielen. Laufzeit 03:31 Minuten.
Or da Telesguard dals 22.06.2018.

Sper il premi uffizial e vegnì surdà era il premi dal public. Il project na persvada betg mo a la giuria, mabain era il public ha votà. Ed era qua ha il project da Scuol persvadì.

Project tavlas d’infurmaziun

38 tavlas multifuncziunalas èn vegnidas montadas en l'entira regiun da Ftan a Samignun. Ina giada l’onn ins volva quellas. Dad ina vart chatt'ins infurmaziuns sur dad animals, amfibis, flora e fauna – e da l’autra vart da la tavla la vita dals tschiervs, chamutschs e capricorns e lur vita durant l’enviern.

Project cleragls en il guaud

Las commembras ed ils commembers da las secziuns han cultivà differents cleragls per pussibilitar a la selvaschina da chattar uschia in spazi per viver, surviver e chattar da magliar.

Uniun «Chatscha Svizra»

«Chatscha Svizra» è l’uniun tetgala da tut las secziuns da chatscha en Svizra. Ella represchenta ils interess da radund 30’000 chatschaduras e chatschadurs.

RR actualitad 07:20