Ina gruppa da lavur da geniturs, scolars e scolaras da tut las fracziuns, commembers da la baselgia en collavuraziun cun «Jugend Graubünden» ha elavurà il project. La finamira da la vischnanca da Scuol è d’engaschar duas persunas cun in pensum da radund 70% e 30% che sa fatschentan cun las giuvnas e ed ils giuvens tranter 11 e 18 onns.
La lavur da quels dus collavuraturs per la lavur sociala cun giuvenils è en in'emprima fasa dad evaluar ils basegns da giuvnas e giuvens e lura da stgaffir purschidas adattadas. Quai po esser in local per simplamain sa trategnair, ma era da dar la pussaivladad da far lavurs per exempel en lain u metal u forsa era cuschinar. Las purschidas duessan vegnir stgaffidas collavurond cun ils giuvenils per esser propi datiers ad els, uschè il cusseglier communal Fadri Häfner da Guarda.
Quellas persunas responsablas duessan però era avair ureglias avertas per dumondas urgentas u problems per exempel cun lur magisters, geniturs u amias ed amis.
Era autras fracziuns en dumandadas
Per cumenzar sa focusescha il project sin la fracziun da Scuol, ma la finamira è cleramain dad integrar era las ulteriuras fracziuns. Il project dura trais onns cun la finamira da vulair prolungar quel sch’il basegn è avant man. L’entschatta è prevesida il matg 2022.