Siglir tar il cuntegn

Header

cuntegn

Legenda da skis festivescha 80 onns Dumeng Giovanoli

Il pli gugent è Dumeng Giovanoli anc adina sin pista cun skis u la stad en gir cun ses bike. Sia professiun, il cuschinar tutga anca adina tar il mintgadi da l’um cun ils chavels alvischems ed in rir da sfarfatg.

Il «champiun» è restà

Anc oz, passa 50 onns suenter sia carriera da skiunz cun ils gronds success a Wengen e Kitzbühel, vegnan ils giasts en l’hotel da la famiglia Giovanoli a Segl per inscuntrar lur idol «Dumeng». En normals temps cuschina el perquai er regularmain tratgs indigens per lur giasts ed amis.

Da la Val Fex sin il podest a Kitzbühel

Success haja Dumeng Giovanoli gì surtut perquai ch’el n’haja mai resentì squitsch da sia famiglia. Ed ambizius è l’amatur da la Val Fex gia adina stà.

Quai era simplamain en mai da vulair daventar campiun da skis.
Autur: Dumeng Giovanoliskiunz ed hotelier, Segl

Entant ha il giubilar emprendì a prender tut pli patgific e da giudair d’avair la famiglia enturn sai cun ils biadis. Cursas da skis guarda el regularmain, ma na fin a la fin. Per il solit saja l’ora bler memia bella per star en stiva davant la televisiun. Bler pli gugent tira Dumeng Giovanoli in pèr stortas sin pista, sche pussaivel en cumpagnia da buns amis.

In schottisch per l’anniversari

Causa corona sto la festa per ils 80 onns vegnir spustada sin pli tard. Regals haja el gia survegnì plirs. Tranter auter haja in ami cumponì aposta per el il toc: «Der Stangenakrobat». In viva ha Dumeng Giovanoli gia pudì far en il ravugl da la famiglia. Quella saja insumma il pli impurtant, sper la sanadad.

Artitgels legids il pli savens

Scrollar a sanestra Scrollar a dretga