Segirar pli fitg il provediment d’electricitad en il Grischun ed augmentar la capacitad d’importar energia. Quai vul Swissgrid cuntanscher cun augmentar il conduct da fitg auta tensiun tranter Pradella e La Punt. Ultra da quai svaneschan 1100 pitgas tranter Pradella e Bever.
Glisch verda per la cumplettaziun da la rait d'auta tensiun
Uss ha l’Inspecturat federal d’installaziuns a current ferm concedì la permissiun da construcziun. Cunquai possian els cumenzar cun las lavurs per rinforzar u remplazzar las pitgas, ha Swissgrid communitgà. Ils davos dus onns han ins fatg sanaziuns vi dals fundaments da las pitgas.
Per lung da l’entir traject da 50 kilometers lunghezza, vegn il conduct extendì a duas lingias da 380 kilovolts. L’emprima etappa tranter Pradella e Zernez è previsa il 2021 e la segunda etappa tranter Zernez e La Punt suonda lura il 2022.
1100 pitgas electricas svaneschan
Sco mesira substitutiva gida Swissgrid las Ouvras Electricas d’Engiadina da dischlocar ina lingia d’auta tensiun tranter Pradella e Bever en il terren. La lingia al liber da 60 kilovolt vegn remplazzada cun in cabel sutterran da 110 kilovolt. Ultra da quai vegn mess latiers in ulteriur cabel che pussibiltescha las vischnancas dad avair access ad internet da spectrum lartg (Breitbandinternet).
Ils cabels èn entant tuts sut terra. Las lavurs da rumir las 1’100 pitgas han gia cumenzà, e vegnan probablamain ad esser a fin en dus onns.
