Suenter il success da l’emprima ediziun dal festival «Machöas. LitteraturA Nairs» avant trais onns davart «il feminin» en la litteratura rumantscha, ha lieu suenter ina pausa sfurzada la segunda dieta litterara. «Bestial. LitteraturA Nairs» è in colloqui davart la relaziun da l’uman cun animals en la litteratura rumantscha e quai cun prelecziuns dad auturas ed auturs, referats, ina discussiun al podi e blers inscunters.
LitteraturA Nairs è in festival cun in cler focus tematic e vul uschia era sa differenziar dals tradiziunals Dis da litteratura a Domat che han lieu en trais emnas. L’ediziun dal 2021 metta il focus sin l’animal en ovras rumantschas. Tge animals entran en ovras rumantschas e pertge? Co servan animals per ans s'exprimer? E tge ans mussan nossas cuncreatiras davart l’esser uman?
Il program è spess e porscha blera variaziun. LitteraturA Nairs vul dar impuls ed esser ina plattafurma per discutar litteratura rumantscha. La dieta vul pussibilitar in stgomi fritgaivel tranter scripturAs, editurAs, lecturAs, scienziadas e scienziads cun la finamira da contribuir e rinforzar la scena da litteratura rumantscha.
