La litteratura rumantscha ha in grond stgazi cun numerusas poetessas e poets ch'han publitgà l’ultim temp lur ovras. E savens èn ils temas ils medems, dentant anc adina actuals.
En las poesias vegn savens scrit da la patria, la natira ed er l’encreschadetgna. Sa midà han simplamain las auturas ed ils auturs.
Poesias na sajan dentant betg insatge per ina e mintgin, uschia Gianna Duschletta. La studenta da 22 onns giavischass perquai dapli cudeschs cun istorgias inventadas.
A mai mancan cudeschs en lingua rumantscha cun istorgias ch'animeschan e trategnan la lectura ed il lectur.
La litteratura rumantscha signifitga per l’Engiadinaisa fitg bler e grazia a quella possia ella er adina puspè engrondir ses stgazi da pleds. Quai surtut uss che Gianna Duschletta viva per ses studi a Berna. Sch’ella pudess giavischar ina traducziun d’in cudesch en lingua rumantscha, preferiss ella ils cudeschs da Carlos Ruiz Zafòn.