Siglir tar il cuntegn

Header

Albert Giger, in um vegl cun ina giacca pinka, envida la flomma olimpica. El stà per quai sin in podest.
Legenda: Albert Giger, il victur d'ina medaglia da bronz als gieus olimpics a Sapporo dal 1972, ha envidà la flomma olimpica a San Murezzan. RTR, Riccarda Müller
cuntegn

Losanna/San Murezzan Ils gieus olimpics da giuvenils èn averts

Per la terza giada arda la flomma olimpica cun quai en Svizra, e per la terza giada er a San Murezzan.

Bun 250 atletas ed atlets vegnan a cumbatter durant las proximas duas emnas a San Murezzan per medaglias en las disciplinas da patinadi da sveltezza, bob, skeleton e scarsolar. Els èn vegnids beneventads la gievgia saira a San Murezzan sin la «Medal Plaza» en il rom d'ina festa d'avertura. Tranter auter hai dà in pled da bainvegni dal directur da Swiss Olympic, Roger Schnegg.

Questa festa ha gì lieu parallel a la festa principala a Losanna, ch'è vegnida mussada suenter la part uffiziala a San Murezzan en furma da Public Viewing.

Per la terza giada arda la flomma olimpica en Svizra

Sco finiziun da la festa d'avertura è vegnida envidada tant a Losanna sco era a San Murezzan la flomma olimpica. A San Murezzan da l'anteriur passlunghist Albert Giger, che ha gudagnà ina medaglia da bronz cun la staffetta als gieus olimpics 1972 a Sapporo.

Cun quai arda uss per la terza giada insumma la flomma olimpica en Svizra, per la terza giada era a San Murezzan. Là han gia gì lieu ils onns 1928 e 1948 gieus olimpics.

Song uffizial cun rappunz rumantsch

Sco igl è usit tar occurrenzas olimpicas datti er per ils gieus olimpics da giuvenils ina chanzun uffiziala, in song spezial ed adattà. Er part da questa chanzun fa il rappunz grischun Ivo Orlik, alias Giganto. Il moderatur dad RTR, Livio Foffa ha pudì discurrer cun el.

E qua pudais vus era tadlar la chanzun uffiziala «Start now».

RTR novitads 06:00