Il project solar alpin a Samedan ha cuntanschì in pass impurtant: la lubientscha da construcziun è ussa valaivla ed ils partenaris dal project han fundà l'Energia Solara Engiadinaisa SA per bajegiar e mantegnair il project. Tenor la communicaziun a las medias da la firma vegn cumenzà cun la construcziun la primavaira 2027.
Lubientscha da construcziun ed adattaziuns
La lubientscha per il project solar è vegnida dada suenter ch'il project è vegnì optimà ed adattà a las pretensiuns chantunalas. Duas parts da l’implant da la vart da l’ost han stuì vegnir stritgadas per motivs da segirezza en cas da lavinas. Malgrà questas midadas, duai la producziun d'energia restar sin il medem nivel sco planisà.
Ils partenaris dal project, tranter auter TNC Consulting AG ed Energia Samedan, han fundà l'Energia Solara Engiadinaisa SA. Questa societad ha l'incumbensa da bajegiar e gestiunar l’implant solar a Samedan.
Anc blera lavur che spetga
Fin che l’implant po vegnir bajegià datti anc blera lavur per l'Energia Solara Engiadinaisa SA. Las lavurs ston vegnir scrittas ora e l'atun duai dar la decisiun da bajegiar dals partenaris, quai che n’è betg 100% segir tenor il president dal cussegl d’administraziun da la firma, Martin Merz declera: «Sche nus avain ensemen ils custs per bajegiar l’implant solar a Samedan, pudain decider, sch'i vala la paina finanzialmain da cumenzar.»
Sche ils custs offrids da las firmas sa movian en il rom dals custs spetgads da radund 40 – 45 milliuns francs duai l’implant solar era vegnir construì.
Jau ves las schanzas uss tar bunamain 80% che nus cumenzain a fabritgar ils panels solars gia il proxim enviern, e che l’implant po ir vi da la rait vers la fin dal 2027. Tut è uss dependent da las calculaziuns economicas.
Plinavant vul la Energia Solara Engiadinaisa SA far l'onn che vegn la dumonda formala per survegnir ina contribuziun da promoziun da l'Uffizi federal per energia. Sche tut va tenor plan duai l’emprima part da l'implant fotovoltaic ir d’atun 2027 vi da la rait.