«Lü Stailas» serra sias portas e fa midada

L’emprim center d’astronomia e d’astrofotografia da l’Europa, l’Alpine Astrovillage Lü Stailas banduna la Val Müstair. Quai rapporta la Posta Ladina. Ils manaders da l'observatori, il pèr maridà Ourednik, hajan desditg tut ils referats planisads e communitgà ch’els bandunian Lü.

Fotografia dal stabiliment da l’Alpine Astrovillage Lü Stailas. Bild in Lightbox öffnen.

Legenda da maletgs: L'Alpine Astrovillage Lü Stailas serra definitivamain lur portas. RTR

La novitad da la fin da l’Alpine Astrovillage Lü Stailas na vegn betg dal tut nunspetgada. Gia l’entschatta davent dal 2009 ha l'observatori gì da cumbatter cun problems finanzials. Malgrà la purschida unica mancavan surtut las frequenzas e qua tras è creschì il squitsch finanzial mintg’onn in pau dapli per ils dus manaders da Lü Stailas, Václav e Jitka Ourednik.

Differenzas d’opiniun han provocà decisiun

Tenor ils Ourednik’s na possia l'observatori betg vegnir manà a moda economica. Las entradas na bastian betg per far las amortisaziuns annualas. Perquai avevan ins tschertgà adina puspè ina soluziun cun la vischnanca ch'aveva dà da lez temp ina garanzia da deficit da sur 500’000 francs per quest project. La proposta da la suprastanza communala fiss stada quella, che la vischnanca avess surpiglià il stabiliment ed ils Ourednik’s avessan pajà in tschains da locaziun. Tar quai n’èsi però betg vegnì.

Nov'entschatta per l'Astrovillage en in auter lieu

Tant a la vischnanca da Val Müstair sco er a la destinaziun turistica displascha la decisiun dals manaders da serrar ussa definitivamain las portas da l’observatori a Lü. Oravant tut perquai ch’ins era anc en il process da tractativas.

Sco Václav Ourednik ha confermà ad RTR, hajan els chattà in nov lieu per lur gestiun. Nua precis na vuleva el anc betg tradir, mo tant che l'Astrovillage duai far midada il schaner 2018 e restar en il Grischun, simplamain in zic pli en il nord. Tge che capita dentant cun l'edifizi a Lü è anc avert.

RR novitads 12:00