Gia il schaner ha il Lyceum Alpinum Zuoz survegnì emprimas infurmaziuns sur dal coronavirus. Geniturs da scolars Chinais han numnadamain fatg attent la scola ch’i pudess dar problems pervi d’il coronavirus, uschè Christoph Wittmer, il rectur dal Lyceum Alpinum. Causa che las instanzas federalas na sajan da quel temp anc betg stadas prontas, hajan ils responsabels da la scola internaziunala fatg retschertgas e tratg decisiuns.
Resguardar opiniun dals giuvens
Ina rolla centrala hajan tenor Christoph Wittmer giugà dapi il cumenzament las studentas ed ils students. Cun quai ch’els na tutgian betg tar la gruppa da ristg, sajan els numnadamain quels, che hajan da gidar ad auters cun tegnair en las mesiras da protecziun. Tenor Wittmer sa haja fatg bunas experientschas cun involver ils giuvenils en las decisiuns per la scola.
Film da giuvens per giuvens
Ina gruppa da studentas e students ha realisà in film curt da giuvens per giuvens. Il messadi è numnadamain da motivar ad auters giuvens da tegnair en las reglas ed acceptar la situaziun actuala co ch’ella è.
