Maioritad absoluta memia auta per elecziuns a S-chanf

Sper ils trais candidats per il presidi n’ha bunamain nagin cuntanschì las vuschs minimalas per in sez en in dals gremis politics da la vischnanca.

vischnanca da S-chanf Bild in Lightbox öffnen.

Legenda da maletgs: Tgi che vegn ad esser al timun da S-chanf a partir dal 2017, vegn decidì en in 2. scrutini. RTR, Anna Caprez

I dat in segund scrutini tant per la successiun da Duri Campell sco president communal, sco era per il cussegl communal, la cumissiun da gestiun ed era per il cussegl da scola. La nova furmla ch’ils votants da S-chanf avevan giavischà ed approvà en la constituziun communala, saja sa mussada sco memia difficila, ha declerà il president communal Duri Campell ad RTR.

Mess la latta memia aut

Ins haja vulì impedir ch’ina elecziun en in gremi a S-chanf saja memia simpla, ed haja perquai midà la clav per eruir la maioritad absoluta. Ils resultats da las elecziuns da dumengia ils 30 d’october hajan dentant mussà che quella mesira saja memia restrictiva, di Campell.

Proxima runda quinta «la relativa»

Tar il proxim scrutini na quinta dentant betg pli la maioritad absoluta, mabain quella relativa. Vul dir ch’i gudognan quels candidats cun las pli bleras vuschs. L’artitgel en la constituziun davart la clav per la maioritad absoluta, haja la vischnanca puspè da midar, manegia Campell.

artitgel sin palpiri Avrir maletg en lightbox.

Legenda da maletgs: L'artitgel 39 en la constituziun da S-chanf. RTR, Anna Caprez

Anc dus candidats en cursa per presidi

Per il presidi da S-chanf a partir dal 2017 èn entant anc dus candidants en cursa:

  • Gian Fadri Largiadèr
  • Gian Andrea Bott

Peter Angelini, ch'aveva fatg cun 75 vuschs il resultat il pli bass, sa retira da la cursa.

Appell a giuvens

Ideal fiss ussa er ch’in u l’auter giuven s’annunziass per in sez en il nov gremi da suppleant cussegl communal. Quel hajan ins stgaffì aposta per dar la pussaivladad a glieud giuvna da far l’emprim pass en la politica.

Tar l’emprim scrutini n’aveva nagin s’annunzià. Duas persunas han dentant tuttina survegnì passa 10 vuschs.

Il segund scrutini per las elecziuns communalas da S-chanf per il temp d’uffizi 2017-2019 ha lieu ils 27 da november 2016.

RR actualitad mezdi 11:00