Malögia perda ses uffizi postal

Il vitg da Malögia perda ses uffizi postal. Enstagl duain ils da Malögia survegnir in’agentura da La Posta. Uschia ha La Posta infurmà quests dis las abitantas ed ils abitants da la vischnanca da Bregaglia.

posta malögia Bild in Lightbox öffnen.

Legenda da maletgs: L'uffizi postal a Malögia, bainbaud in center da servetschs? RTR, Violanta Rominger

Adina pli paucs fan diever dals servetschs che La Posta porscha. Sco en divers auters lieus en il Grischun è questa raschun era il motiv principal per serrar l'uffizi postal a Malögia. Tenor la vischnanca na vegn questa decisiun dentant betg nunspetgadamain. Perquai han ins empruvà da chattar ina buna soluziun ensemen cun La Posta.

Vischnanca vul cumbinar divers servetschs

La proposta da la vischnanca fiss da surprender la parcella nua che la posta sa chatta actualmain e da fabritgar ordlonder in center che porscha dasper in’agentura da La Posta anc auters servetschs, sco per exempel il biro d’infurmaziun e la chanzlia. Tenor la vischnanca da Bregaglia possian ins mo uschia garantir er en l'avegnir in servetsch da posta sco fin ussa.

Radunanza duai decider

La vischnanca da Bregaglia tractandescha perquai ina dumonda da credit en l’autezza da 770’000 francs en sia proxima radunanza communala dals 15 da december. Sche la populaziun avess dentant da sbittar questa proposta ston ins chattar in'autra soluziun. Co quella guardass alura ora na saveva la vischnanca anc betg respunder. Il pli probabel restass mo anc la soluziun cun in servetsch da chasa, annunzia la vischnanca.