Mals senza pesticids: ordinaziun en vigur

La vischnanca da Mals ha decretà in'ordinaziun che duai exequir la decisiun dal pievel dal 2014 da desister da pesticids sin il territori da la vischnanca.

Placat: Gemeinde Mals frei von Pestiziden Bild in Lightbox öffnen.

Legenda da maletgs: Mals ha decidì l'onn 2014 cun 75% da las vuschs da vulair desister sin pesticids sin il territori da la vischnanca. RTR/D. Spinnler

L'ordinaziun per evitar il diever da pesticids en l'agricultura a Mals è en vigur dapi radund duas emnas. Quai ha ditg il president communal da Mals, Ulrich Veith a Radiotelevisiun Svizra Rumantscha RTR. La vischnanca ha copià ina idea da la vischnanca da Malosco en il Trentino. Quai vul dir che l'ordinaziun prescriva ussa distanzas ch'in pur sto respectar per insumma pudair applitgar pesticids. Uschia ston ins esser almain 50 meters sin distanza dal cunfin da l'atgna parcella e sin 200 meters distanza da tut las auas. Uschia n'èsi de facto betg pli pussaivel da duvrar pesticids a Mals ha ditg Veith.

Plantaziuns da puma a Mals Avrir maletg en lightbox.

Legenda da maletgs: Las plantaziuns da puma en il Tirol da Sid èn fitg grondas. RTR/D. Spinnler

Recurs probabels

Il president communal fa quint ch'i vegn a dar recurs encunter l'ordinaziun. El è dentant segir che l'ordinaziun na cuntrafetschia a naginas leschas. Perquai spetga el cun calma quai che vegn. Veith è persvadì che Mals è sin la gista via cun questa ordinaziun. Quai demussia l'interess enorm da medias da tut il mund. Tuts vulan rapportar da la prima vischnanca che impedescha il diever da pesticids.

Mailers en flur. Avrir maletg en lightbox.

Legenda da maletgs: Mailers en flur a Mals. RTR/D. Spinnler

Decisiun dal pievel dal 2014

Cumenzà aveva tut l'onn 2014. Lura aveva votà la populaziun da Mals davart la dumonda: Duai la vischnanca scumandar il diever da pesticids sin il territori da la vischnanca. La populaziun aveva ditg gea cun 75% da las vuschs. Suenter ha lura cumenzà ina dispita schebain la decisiun è valaivla u betg. I ha numnadamain dà vuschs che argumentavan che la decisiun da Mals cuntrafetschia a dretg superiur e che la vischnanca na possia betg decider in tal scumond.